تسبیح دے اِک اِک دانے تے
تُوں یار دا وِرد پکؤندا رو
او رُسیاء آپّے مَن جائے گا
تُوں اپنا فرض نِبہوندا رو
تُوں دِل دے شیشے وِچ رکھ لے
تصویراں اپنے یار دیاں
تُوں مار کے چاتی اپنے وِچ
نِت یار دا درشن پاؤندا رو
چھڈ چُھوٹے وِرد وظیفے نُوں
اودے عِشق دا قاعدہ پڑھیا کر
جگ پانویں کافر کیندا رئے
تُوں ایہو سبق پکؤندا رو
او بولے پانویں نہ بولے
اے مرضی اودے دِل دی اے
سِر رکھ کے یار دے قدماں تے
تُوں سجناں سِیس نوؤندا رو
جئے بندیا تُوں کُج کھٹنا اے
بس اِک دا ہو جا چُپ کر کے
تُوں لگ کے آکھے لوکاں دے
ناں ایویں وقت گواؤندا رو
جئے تک لیا سوھنے اِک واری
تینوں منزل مِل جائے گی
تُوں اَتھرو اودیاں یاداں دے
نِت اکھیاں وِچ سجؤندا رو