Tag: Nasir Kazmi

میں ھُوں رات کا ایک بجا ھے
خالی رستہ بول رھا ھے

آج تو یوں خاموش ھے دُنیا
جیسے کچھ ھونے والا ھے

کیسی اندھیری رات ھے دیکھو
اپنے آپ سے ڈر لگتا ھے

آج تو شہر کی رَوش رَوش پر
پتوں کا میلہ سا لگا ھے

آو گھاس پہ سَبھا جمائیں
میخانہ تو بند پڑا ھے

پُھول تو سارے جھڑ گئے لیکن
تیری یاد کا زخم ھرا ھے

تُو نے جتنا پیار کیا تھا
دُکھ بھی مجھے اتنا ھی دیا ھے

یہ بھی ھے ایک طرح کی محبت
میں تُجھ سے تُو مُجھ سے جُدا ھے

یہ تیری منزل ، وہ میرا رستہ
تیرا میرا ساتھ ھی کیا ھے

میں نے تو اِک بات کہی تھی
کیا تُو سَچ مُچ رُوٹھ گیا ھے

ایسا گاھک کون ھے جِس نے
سُکھ دے کر دُکھ مول لیا ھے

تیرا رستہ تکتے تکتے
کھیت گگن کا سُوکھ چلا ھے

کِھڑکی کھول کے دیکھ تو باھر
دیر سے کوئی شخص کھڑا ھے

ساری بستی سو گئی ناصر
تُو اب تک کیوں جاگ رھا ھے

اے ہم سُخن وفا کا تقاضا ہے اب یہی
مَیں اپنے ہاتھ کاٹ لوں ــ تُو اپنے ہونٹ سی

کن بے دلوں میں پھینک دیا حادثات نے
آنکھوں میں جن کی نُور ــ نہ باتوں میں تازگی

بول اے میرے دیار کی سوئی ہُوئی زمیں
میں جن کو ڈھونڈتا ہوں ــ کہاں ہیں وہ آدمی؟

وہ شاعروں کا شہر ـ ـ وہ لاہور بُجھ گیا
اُگتے تھے جس میں شعر ــ وہ کھیتی ہی جل گئی

میٹھے تھے جن کے پھل ـ ـ وہ شجر کٹ کٹا گئے
ٹھنڈی تھی جس کی چھاؤں ــ وہ دیوار گر گئی

بازار بند ـ ـ راستے سُنسان ، بے چراغ
وہ رات ہے ــ کہ گھر سے نکلتا نہیں کوئی

گلیوں میں اب تو ـ ـ شام سے پھرتے ہیں پہرہ دار
ہے کوئی کوئی شمع ــ سو وہ بھی بُجھی بُجھی

اے روشنئ دیدہ و دل ـ ـ اب نظر بھی آ
دُنیا ترے فراق میں ــ اندھیر ہو گئی

القصہ ـ ـ جیب چاک ہی کرنی پڑی ہمیں
گو اِبتدائے غم میں ــ بڑی احتیاط کی

اب جی میں ہے ـ ـ کہ سر کسی پتھر سے پھوڑیئے
ممکن ہے ــ قلبِ سنگ سے نکلے کوئی پری

بیکار بیٹھے رہنے سے بہتر ہے ـ ـ کوئی دن
تصویر کھینچیے ــ کسی موجِ خیال کی

ناصرؔ ـــــــ بہت سی خُواہشیں دل میں ہیں بے قرار
لیکن کہاں سے لاؤں ــ وُہ بے فِکر زندگی

نیتِ شوق بھر نہ جائے کہیں
تو بھی دل سے اتر نہ جائے کہیں

آج دیکھا ہے تجھ کو دیر کے بعد
آج کا دن گزر نہ جائے کہیں

نہ ملا کر اداس لوگوں سے
حسن تیرا بکھر نہ جائے کہیں

آرزو ہے کہ تو یہاں آئے
اور پھر عمر بھر نہ جائے کہیں

جی جلاتا ہوں اور سوچتا ہوں
رائیگاں یہ ہنر نہ جائے کہیں

آو کچھ دیر رو ہی لیں ناصر
پھر یہ دریا اتر نہ جائے کہیں

ناصر کاظمی

پھر ساون رت کی پون چلی تم یاد آئے​
پھر پتوں کی پازیب بجی تم یاد آئے​

​پھر کونجیں بولیں گھاس کے ہرے سمندر میں​
رت آئی پیلے پھولوں کی تم یاد آئے​

​پھر کاگا بولا گھر کے سونے آنگن میں​
پھر امرت رس کی بوند پڑی تم یاد آئے​

​پہلے تو میں چیخ کے رویا اور پھر ہنسنے لگا​
بادل گرجا بجلی چمکی تم یاد آئے​

​دن بھر تو میں دنیا کے دھندوں میں کھویا رہا​
جب دیواروں سے دھوپ ڈھلی تم یاد آئے​

​ناصر کاظمی