ڈوب کر دیکھ لے کبھوٗ مجھ میں

ڈوب کر دیکھ لے کبھوٗ مجھ میں
کس کی خوشبوٗ ہے کوٗ بہ کوٗ مجھ میں

ہر گھڑی محوِ گفتگوٗ مجھ میں
کون در آیا خوش گلوٗ مجھ میں

کتنی سمٹی ہوئی مری ہستی
کتنا پھیلا ہوا ہے توٗ مجھ میں

اُن کو تیرے سراغ سے ہے غرَض
اور دیکھیں گے کیا عدوٗ مجھ میں

گھُٹنے لگتا ہے دَم مسرّت کا
درد ہوتا ہے سرخ روٗ مجھ میں

اب کہاں وہ زبانِ خلق میں بات
کیجیے میری جستجوٗ مجھ میں

کب نہ تھا چاک دامنِ احوال
کب نہ تھی حاجتِ رفوٗ مجھ میں

خوب صورت حیات لگنے لگی
بس گیا جب وہ خوب روٗ مجھ میں

آسماں میں رواں دواں خورشید
تجھ سے ملنے کی آرزوٗ مجھ میں

سہمے سہمے خرَد کے بال و پر
چل رہی ہے جنوٗں کی لوٗ مجھ میں

کس کی چاہت کی فاختہ راغبؔ
اڑتی رہتی ہے چار سوٗ مجھ میں

افتخار راغبؔ