Category: Qatat

مِٹا دو شوق سے آ کر ، مِٹا دو میری تربت کو
جو تم پر مٙر مٹا ہو اُس کا اِتنا بھی نشاں کیوں ہو

تیرے تیروں نے “بیدم” کو حیاتِ جاوداں بخشی
حیاتِ جاوداں کا نام مرگِ جاوداں کیوں ہو

یادوں کے سمن زار سے ——آئی ہوئی خوشبو
دامن میں چھپا لائی ہے کیا تم بھی تو دیکھو

کچھ رات گئے روز جو——— آتی ہے فضا سے
ہر دل میں ہے اک زخم چھپا تم بھی تو دیکھو

یوں بچھڑنے کی وضاحت ہی نہیں کی اس نے
میں سمجھتا ہوں محبت ہی نہیں کی اس نے
میں کسی اور سے ملنے کے لئے آیا ہوں
میری اس بات پہ حیرت ہی نہیں کی اس نے

ہمارے ہاتھ میں اس کی لگام تھوڑی ہے
وہ ہمسفر ہے ہمارا غلام تھوڑی ہے

ہم اپنے آپ سے ملتے ہیں تو، سنورتے ہیں
کسی کے واسطے یہ اہتمام تھوڑی ہے

کسی بھی لفظ کا جادُو اَثر نہیں کرتا
وہ اپنے دل کی مجھے بھی خبر نہیں کرتا

بنا ہوا ہے بظاہر وہ بے تعلّق بھی
جو مجھ کو سوچے بِنا دن بسر نہیں کرتا

یہ نگائیں یہ اشارے یہ ادائیں توبہ
ان شرابوں کو سرعام لٹایا نہ کرو

شام گہری ہو تو کچھ حسین ہوتی ہے
سایہ زلف کو چہرے سے ہٹایا نہ کرو