چاند سا چہرہ ، نُور سی چتون ماشاء اللہ ! ماشاء اللہ
خوب نکالا آپ نے جوبن ماشاء اللہ ! ماشاء اللہ
گُل رُخِ نازک، زلف ھے سنبل آنکھ ھے نرگس ، سیب زنخداں
حُسن سے تم ھو غیرتِ گلشن ماشاء اللہ ! ماشاء اللہ
ساقیِ بزمِ روزِ ازل نے بادۂ حسن بھرا ھے اس میں
آنکھیں ھیں ساغر ، شیشہ ھے گردن ماشاء اللہ ! ماشاء اللہ
قہر غضب ظاھر کی رکاوٹ آفتِ جاں درپردہ لگاوٹ
چاہ کے تیور ، پیار کی چتون ماشاء اللہ ! ماشاء اللہ
غمزہ اچکّا، عشوہ ھے ڈاکو قہر ادائیں ، سحر ھیں باتیں
چور نگاھیں، ناز ھے رھزن ماشاء اللہ ! ماشاء اللہ
نور کا تن ھے ، نور کے کپڑے اُس پر کیا زیور کی چمک ھے
چَھلے، کنگن ، اِکے ، جوشن ماشاء اللہ ! ماشاء اللہ
جمع کیا ضدّین کو تم نے سختی ایسی ، نرمی ایسی
موم بدن ھے ، دل ھے آھن ماشاء اللہ ! ماشاء اللہ
واہ امیر ، ایسا ھو کہنا شعر ھیں یا معشوق کا گہنا
صاف ھے بندش ، مضموں روشن ماشاء اللہ ! ماشاء اللہ
امیر مینائی
Be First to Comment