حُسن ، مرھُون جوش بادۂ ناز

حُسن ، مرھُون جوش بادۂ ناز
عشق ، منت کشِ فسُون نیاز

دل کا ھر تار ، لرزشِ پیہم
جاں کا ھر رشتہ ، وقفِ سوز و گداز

سوزش دردِ دِل ، کسے معلوم
کون جانے ، کسی کے عشق کا راز

میری خاموشیوں میں ، لرزاں ھے
میرے نالوں کی ، گم شدہ آواز

ھو چکا عشق ، اب ھوس ھی سہی
کیا کریں ، فرض ھے ادائے نماز

تُو ھے ، اور اِک تغافل پیہم
میں ھُوں ، اور انتظار بے انداز

خوفِ ناکامئ اُمید ھے ، فیضؔ
ورنہ ، دِل توڑ دے طلسم مجاز

“فیض احمّد فیض”